watumwa kanisani?

waliowaua J.F Kennedy na Abraham Lincoln wataivuruga Tanzania(4)

OKTOBA, mwaka 2006,gazeti la New African, linalochapishwa 7COLDBATH Square, Jijini London,liliandika katika Toleo lake Nambari 455 kwamba, “  HOW THE ANGLICAN CHURCH TREATED ITS SLAVES”!!
 

Kwamba kanisa la Uingereza,Anglican, liliwahi kuwa na watumwa! Tena, watumwa wenyewe WAAFRIKA ama watu Weusi wa Asili ya Afrika, ‘negros’ wakatumikishwa na kanisa,wakateswa na kulimishwa katika mashamba ya miwa,kisha wakauliwa!

Kanisa hili, ambalo siku hizi huunga mkono ndoa za jinsi moja;ushoga,usagaji na kubadili jinsi(Kanisa la Afrika linajidai kuwa kichwa maji),Mkuu wake ni Malkia.Ndiye anayeteua maaskofu wakuu,makasisi na maofisa wengine.

Kanisa maarufu Uingereza,Westminster Abbey,(1050-1760) ndiko wazikwako watu wakubwa sana wenye kuheshimiwa.

Turejee katika ajenda ya leo,kwamba Feburuali 8 mwaka 2006,Askofu Mkuu wa Cantebury,Rowan Williams(mkuu wa Kanisa wakati huo) aliomba msamaha kwa DHAMBI hiyo ya kanisa kuwatumikisha watumwa,hasa watu WEUSI katika mashamba yaliyokuwa katika makoloni ya Uingereza huko Barbados,katika Visiwa vya Caribbean.

Nataka nikwambie msomaji,uwe makini na kila unachoambiwa na maaskofu,makasisi,wachungaji,manabii wa siku hizi,mitume uchwara na masheikh.Pima matendo yao na kauli zao kwanza.

Mwandishi, Adam Hochschild,  aliandika makala ndefu kwamba visiwa  vya Caribbean(walikopelekwa watumwa ndugu zetu wapendwa) viligeuka nyumba za kunyongea watumwa,kupigwa na kuteswa mithili ya magereza ya Abu Ghraib,Guantanamo na magereza mengine ya siri Ulaya.

Leo,Uingereza huongoza mataifa 54 ya Commonwealth,yaliyokuwa makoloni yake ili kuendeleza ukoloni mamboleo hapa Afrika.

Yangalipo makanisa na misikiti,masinagogi na nyumba za ibada,yanayopokea shuruti toka nje,ili yumkini kuzivuruga nchi zetu kwa ghasia na mauaji. Hivi,makanisa na misikiti,utumwa,mauaji,kunyonga watu na fujo vina uhusiano gani?

Waafrika wengi,hasa vijana wa siku hizi hawajiulizi ‘repercussions’ za kulipwa posho na vi NGO vya Ulaya ili kufanya vurugu hapa,na fujo za kijinga,kwa malipo ya chakula na ahadi.

Tazama Irak na Libya, siku hizi hamkani si shwari na Syria wameitumbukiza nchi katika miali mikali ya moto wa mabomu kwa kisingizio cha kutafuta demokrasia, nadhani tumeona hata Misri na kwingineko. Je, tumeshindwa kudai haki zetu kwa amani?

Wengine,hutumia dini kama zana za kueneza ‘Imperealism’-utawala wan chi moja dhidi ya mataifa mengine duniani.Dini zinapogeuka mlango wa kushawishi mataifa ya Afrika kuwa chini ya akina Malkia ama matajiri wafuasi wa Freemasons Ulaya ama Marekani!

Nakiri,dini halisi haifanyi unyama ninaosema hapa,mbali na kuwafundisha watu amani na upendo na heshima kwa viongozi wa serikali. Kuna serikali katiti na fisadi kuzidi Dola ya Rumi? Mbona Paulo katika Warumi sura 13 anawataka wafuasi wa Ukristo kuheshimu serikali?

Demokrasia na Haki za Binadamu hutumiwa siku hizi na hawa wauaji kama njia ya watu kutafuta haki zaidi,kumbe vijana wanaingia mkenge! Hawa ni wauaji wale wale ambao baba yao ana jicho moja na mkuki mkononi mwake.

Kuna kiitwacho, European Hegemony au tuseme ni ‘Political Domination’ ndicho huwasukuma hawa Wazungu kuvuruga  mataifa ya Afrika kwa vita,fujo,maandamano ya kipuuzi  kwamba ndiyo demokrasia na haki za binadamu!

Wee unachoma moto nyumba na magari ya wenzako kwamba ndiyo haki gani? Unaua wenzako na kuwanyima makazi halafu unasema ni kutafuta haki gani?

Bahati mbaya sana,viongozi wengi wa dini hupokea posho na maagizo kutoka Ulaya na mahali pengine zinakotoka dini zao,mwisho wa siku Afrika inawaka moto kwa machafuko.Huu ni ugaidi unaochochewa na dini hizi.

Mtu mmoja kaandika kwamba, “we need mental decolonization” kwamba tunahitaji kuondokana na utumwa wa fikra-utumwa wa mawazo.

Vyombo vya habari vya Afrika vingali utumwani,Marekani,Uingereza, Ufaransa,Ujerumani,Italia n.k

Kila kinachosemwa na vyombo hivi hushikiliwa na kushabikiwa pasipo kufikiri. Kila upuuzi na ujinga hushangiliwa sana. Mke wa Prince William akiingia hedhi,itatangazwa sana, akipata mtoto ndiyo  ‘Burning Issue’ siku hiyo watu wanapiga simu na kutuma SMS siku nzima! Hamnazo?!!

Kuku wa Mzungu akitaga mayai,watapiga kelele, timu ya Mzungu ikiishinda ya Afrika,watashangilia usiku mzima! Punguani??!!

Naam, huu ndiyo UTUMWA WA AKILI. Ili mradi, televisheni na magazeti ya Afrika na vijiredio vya siku hizi, vimepoteza akili na kutumbukia katika mijadala kuhusu wavuta bangi na wakola wa Ulaya na Marekani(nakisi ya ubongo) hushabikia ‘biased stories’ za Mzungu dhidi ya Afrika.

Kila mawazo ya upumbavu wa Mzungu kwamba Afrika ni nchi iliyopata uhuru mwaka 1994,rais wake ni Mandela na mji mkuu ni Nigeria,hushabikiwa hapa,SMS zitatumwa kila mjinga apate cha kujadili siku hiyo!

Nyimbo zinazopigwa katika vijistesheni vya redio ni upuuzi mtupu,mradi kapiga jambazi mmoja mbwia unga wa Marekani ama Ulaya.Nyimbo za Msondo Ngoma  siku hizi huonekana za kishamba sana!

Rais wa zamani wa Marekani,Thomas Jefferson, aliwahi kusema kwamba,

“All men are created equal..But it would be impossible for black people to understand…”

Kwamba,watu wote wameumbwa wakiwa sawa,lakini ni muhali Mtu Mweusi kuwa na maarifa. Labda niseme utabiri wa Jeffersonb ulishatimia,ndiyo maana tumekosa ufahamu?

Sisi hatujitambui kwamba Mungu alituumba huru na tuko sawa na Mzungu au Mchina? Lakini watu wako radhi kuitwa ‘dog’ la Mzungu ama Mchina,na nywele tumebadili,rangi ya Afrika tumeitupa,hakuna Mwafrika siku hizi, nywele za Mzungu,makalio ya Kichina!

Sikiliza vinyimbo vya vijiredio vyetu..upuuzi. Ndiyo vile Mungu alimwambia Nabii Amosi, “Keep away the noise of your songs” peleka mbali nyimbo za kipuuzi(Amosi 5:23).

Akili za Mtanzania zimelala,zimelevywa na mvinyo wa Magharibi hadi uzalendo kwa nyi yetu umekwisha.Mafisadi huiba ili kuficha mali Ulaya,wanatamani wakaishi Ulaya.Wanaota Ulaya.

Ukiona habari. “The Most Influential People in The World” hakuna Mweusi hata mmoja,utaona wavuta bangi,wabwia unga wa Ulaya humo,hakuna kitu Afrika,na hakuna watu wenye mvuto!

Nijadili kidogo kuhusu uandishi wa habari Tanzania.Mwandishi sharti kuwa na “A Professional Attitude”Mtazamo wa kitaaluma kuhusu unachotaka kufikisha kwa wasomaji,watazamaji ama wasikilizaji.

Kwa kuwa hatuna chetu ila kushabikia upuuzi wa Marekani na Ulaya,basi watu wetu wanageuzwa kuwa Mzungu anavyotaka!

Kauli ya weledi na taaluma katika habari zinazotangazwa na vyombo vyetu vya habari hakuna.Kwanza waandishi humaliza miezi 10 bila kulipwa-wamedhulumiwa nao hufikiri kuitoroka nchi ama kuisaliti kama wanavyosalitiwa!

BBC,VoA,DW,CNN n.k wanachotangaza siku hizi ndicho kinachoingia akilini mwa watu na kushabikiwa katika mijadala ya vijiredio vingi,Watanzania wameporwa sauti,Mzungu amepewa sauti Afrika.Wakisema, Afrika hakuna fikra ni njaa na ukimwi na vita kutoka Cairo hadi Cape Town,tunakubali.Wakisema Dar hadi Accra  hakuna maarifa,tunasema ndiyoo! Hamnazo??

Kuna dhuluma,ufisadi na ushoga wa kifikra, sauti kapewa Mzungu hapa kwetu.Juzi tumeona Venezuela wabunge wakikunjana ngumi bungeni, tusubiri hapa akina Tundu Lissu wetu na akina Stephen Wassira na Lukuvi!

Watanzania tumegeuka watoto.Tunalalamika kama watoto.Tuna akili za kitoto,tunaidai serikali itufanyie kila kitu kama watoto: Itununulie maziwa, itupe nguo na chakula…hatudai kusimama na kufanya mambo mengi kama watu wazima.

Mwisho wa siku,Bunge hili, serikali na wanasiasa hawa wanatuona sisi kama watoto wadogo;wanatudanganya, “Takununulia pipi,peremende,chips’wakati wa chaguzi kumbe tunadanganywa huku tukisema,’sidanganyiki!’Chizi??!

Niimbe wimbo wangu uliotungwa na rafiki,

“Each time we blame the government for failing to keep us safe, and the government goes back to treat us like children!”

Leo,tunasukuma gari la mwanasiasa huyu, kesho serikali inakuja kumwaga peremende na chips,tunahamia huko na kuimba nyimbo za shangwe; hatuna akili,tunahadaika na wanasiasa wanajua sisi ni watoto wadogo,ndiyo maana serikali imechelea kutwambia kwamba ni ujinga kila kitu kuandamana na kuchoma matairi barabarani!

Watu wa aina hii hakuna kuwakataza,ni kuja na staili ya kuwadanganya maana ni watoto,kila mwenye hadaa huwateka akili.Siku hizi wanawafuata wenye ahadi, “Takununulia kaptula enhee!” Wanasema Hureee! Chizi?

Tujikinge na propaganda,tuamke,tusidanganyike kwa upuuzi wa kutumiwa ili nchi yetu iwake moto wa matairi na maguruneti  bure.

Tunahitaji Mtazamo Mpya, “New Attitude’ ili kujilinda na chachu ya Mafarisayo wa siku hizi.Busara Tanzania imekwisha, akili zimelala,uzalendo uko ICU’’Tumekwisha,tunahitaji dose  dhidi ya   ukoloni wa akili- mental decolonization.

Bila hivi,Waliowaua J.F Kennedy na Abraham Lincoln wanaivuruga nchi yetu, kwa kutumia makanisa,misikiti,majukwaa ya siasa n.k

TAMATI

WWW.congesmrambatoday.blogspot.com

0786 324 074

ZIARA ZA AKINA OBAMA AFRIKA HAZINA KITU(1)

NILISOMA katika gazeti la The African la Aprili 23-Mei 3 mwaka huu,hususan katia katuni ya GADO,kwamba Rais wa Marekani na mkewe,Michelle, watakuja Afrika ya Mashariki.
Naam, niliona katika katuni ile Obama na Michelle wakiteremka katika dege lile la Air Force One,huku kukiwa na maandishi, "Obama to visit Africa" huku wakipokelewa na wawekezaji wa kichina!
Utadhani Afrika, isipokuwa mali ya Mzungu,basi itaangukia katika ushawishi wa wageni hususan Wachina!
Wachina, wanafanya biashara Afrika,na wametujengea ofisi za Makao Makuu ya Umoja wa Afrika,AU, kule Addis Ababa.
Ni hapa naanza kutafakari ujio wa wakubwa hawa wa dunia hapa Afrika,hususan Tanzania yetu kama ifuatavyo:

UJIO wa Rais George Walker Bush  Afrika,  hapa Tanzania  mwaka 2008  ulifanya mfumo wa kawaida wa maisha ya watu kusimama.

   Ni kawaida kusimama. Kila kinakokwenda kivuli cha Bush, Clinton,Obama,Malkia Elizabeth na watoto ama wake zao, mfumo wa maisha ya kila siku husimama hasa wanapokaa takriban wiki nzima.

  Ni jua tu ndilo halisimami; yaani ni dunia tu ndiyo huendelea kulizunguka jua na kutufanya tuone kwamba dunia ingali inazunguka.Wakati mwingine tunapumua kwa shida. Bush, ni kama Mungu ama malaika, sijui.

   Bush, alikuja Tanzania miezi kama kumi tu kabla ya Uchaguzi Mkuu wa  nchi hiyo mwaka 2008. Naam, miezi 11kabla ya kuiacha White House kwa Rais mpya atakapoapishwa Januari 20 mwaka 2009.

   Rais wa Marekani alikuja mara ya pili hapa, baada ya miaka minane. Rais Bill Clinton alikuja Arusha, Jumatatu Agosti 27 mwaka 2000. Alialikwa na Msuluhishi wa Mgogoro wa Burundi wakati wa utiaji saini mkataba wa amani, Nelson Mandela.

   Kilichotokea wakati Clinton anashuka uwanja wa Kimataifa wa Ndege wa Kilimanjaro, ni kivuli cha mtu mkubwa kukanyaga ardhi ya watu wanyonge.

  Wamekuja hapa akina Madeleine K. Albright mwaka 1999 mfumo wetu wa maisha ukasimama ili kupisha wa Kimarekani kutandaa nchi masikini.Bendera ya nyota 50 ikapepea anga lote la Mtu Mweusi.

  Jumatano, Julai 13, 2005 mke wa Bush, Laura Welch Bush alitua Dar es salaam kwa ziara ya siku mbili.Julai 2003 Laura alikuwa Nairobi.
Mama huyu amekuja Dar es salaam tena na mumewe, kwake ikiwa ziara ya tatu Afrika Mashariki, na mara kama tano hapa Afrika.

   Luteni Usu, na Rubani wa dege la Jeshi(US Army) anapokuja Tanzania, wengine tunadhani kaja kutafuta namna ya kusimika jeshi la nchi hiyo ili kudhibiti ugaidi na magaidi.Na akina Obama wanakuja hapa kujipendekeza kwetu ili tuwaone rafiki,kumbe ni kuona Wachina wanapata ushawishi mkubwa Afrika,na wanapewa kandarasi,huenda wakatufundisha kichina.

  Wapo wanaodhani kivuli cha ‘kichaka’-Bush ni kutafuta kushawishi serikali za Afrika Mashariki  kuwanyanyasa Waislamu…lakini magaidi hawatambuliki kwa dini moja,
Marekani wapo Wazungu na Wachina Magaidi. Hata Ulaya, wapo magaidi kama Red Brigade, waliomuua Aldo Moro Waziri Mkuu wa Italia, Mafia, na wengine wengi.

   Hata kabla ya Osama kulikuwa na magaidi kama Black September waliowaua na kuwateka nyara wanariadha wa Israeli katika mashindano ya riadha ya Olimpiki mjini Munich, mwaka 1972.
 Magaidi hawana rangi moja, dini moja ama ukoo.

   Bush, kaja Tanzania, Benin, Rwanda, Ghana na Liberia; na mraba huu haudhani kaja kuumiza watu wa dini Fulani ambao walitaka kuandamana kupinga asije!

  Naam, sisimizi kupinga tembo asije, kwake kibarua!

   Yawezekana, Bush na Obama wakaja  kuhakikisha maslahi ya Marekani yanalindwa Afrika hii hata kabla Obama hajaondoka mamlakani.
Maslahi ya Marekani ni pamoja na makampuni ya uchimbaji madini ya (Kimarekani) hapa,  na yale ya uchimbaji mafuta kwingineko Afrika.

   Ukiacha siasa, Bush ni mfanyabiashara wa mafuta na madini. Kampuni yake ya kwanza iliyoanzishwa Midland iliitwa, Arbusto Energy. Arbusto ni neno la Kihispania lenye kumaanisha ‘kichaka’yaani Bush.

   Baadaye, Arbusto ikabadilishwa na kuitwa, Bush Exploration. Ilifilisika mwaka 1980, wakaanzisha nyingine, Spectrum 7; baadaye Harken Energy Corporation. Bush ni mwekezaji pia katika michezo.

  Yeye na matajiri wenzake walinunua timu ya Baseball, ‘Texas Rangers’ kwa dola milioni 75.

  Hii ni kusema, katika ziara yake hapa, akikumbuka kumuuliza Rais Kikwete juu ya michezo waipendayo Watanzania, Kikwete atasema Mpira wa miguu. Anaweza kumshawishi yeye Bush na Wamarekani wenzake kununua hisa katika vilabu vyetu maarufu hapa, kama Yanga!

  Kwa kuwa Bush ni mfanyabiasha wa madini, yawezekana sasa baada ya kuondoka Ikulu, akataka kuwekeza zaidi katika dhahabu, almasi, makaa ya  mawe, mafuta, gesi tanzanite, shaba n.k

   Atataka pengine kuwekeza katika utalii ama sekta ya wanyamapori. Shahada yake ya Uzamili katika Biashara anaweza kuitumia  kuchota rasilimali zetu hapa. Wengine wanasema Bush ni mabepari walewale wanaitangazia Dunia utawala bora, demokrasia na haki, wakati makampuni yao yanaongoza duniani kwa unyonyaji.

   Makampuni ya mafuta kama Chevron, au Chevron Texaco, Conoco Phillips na Exxon Mobil, ni makubwa sana duniani yanayokomba mafuta ya dunia na kutengeneza faida ya zaidi ya dola bilioni 80 kila mwaka.Haya yako Nigeria na popote.

   Hivyo, Marekani hufika sehemu zote kuliko  mafuta ili kushinikiza mambo. Ikitokea nchi ikakatalia mafuta au madini yake, mambo kadhaa, kama ugomvi na vita( kama Iran na Irak) huanza kutokea.

Na watawala wa  nchi hizo wanaokubali kuipa Marekani rasilimali au mafuta, huwa ‘watoto wazuri’ na rafiki kama Marehemu  Mohamed Reza, ama Shah(wa Iran) ama Mobutu hadi wanapotimuliwa, au wanapofariki. Usiombe kuchukiwa na akina Bush na Obama.

   Makampuni hayo ya mafuta ndiyo yanayolalamikiwa sana hata huko Niger Delta, kwa mikataba ya ovyo ya rushwa kwa viongozi wa Nigeria, kama akina Marehemu Dikteta Sani Abacha.

   Ni kwa sababu hii Bwana ‘Arbusto’(Bush) ama mrithi wake Obama  wanastahili kuchungwa sana watakapotaka kuwekeza katika rasilimali zetu.
Aulizwe Obama, kama atakubali kulipa tozo kamili na mrahaba sahihi au wa kinyonyaji kama Niger Delta?Atashinikiza mikataba iwe siri? Utawala bora upi hapo?

   Bush ni ‘pacha’ wa baba yake, George Herbert Walker Bush(84); ambaye Desemba 1989 alituma majeshi Panama na kupindua serikali na kumkamata mateka kiongozi wa nchi hiyo, Jen. Manuel Noriega.
Na Obama ndio wale wale wanaong'ata na kupuliza wakati Gereza la Guantanamo Bay,Cuba linaponyanyasa watu kwa miaka mingi bila kuwafikisha mahakamani,sasa wanasusa kula chakula,dunia kimya!

Bush  Aliingilia ugomvi wa Irak na Kuwait mwaka 1990, alivuruga uchumi uliokuja kurekebishwa na Rais Clinton.Alidhoofisha dola la Urusi(USSR) na kumfanya Mikhail Gorbachev kujisalimisha mikononi mwake mwaka 1989.

   Arbusto(Bush mtoto) aliyewahi kutiwa mbaroni na polisi mwaka 1976 kwa kuendesha gari akiwa ametutika mtindi, anafanana sana na babaye.

  Kasoma chuo kikuu kilekile alichosoma babaye, cha Yale; kaendesha madege ya jeshi kama babaye,anafanya biashara ya mafuta, amewapindua Saddam Hussein na Mullah Mohamad Omar. Mmoja amenyongwa, mwingine ni mkimbizi asiyefahamika alikokimbilia.

   Kama muda wake wa kuwepo Ikulu ungeruhusu, haikosi angemaliza kazi kwa kuwapindua  Marehemu Hugo Chavez wa Venezuela na Ahmadinejad wa Iran.
Hawa, wanakiburi cha mafuta, na marekani huhitaji kama asilimia 30 ya mafuta yote duniani.

   Naam, kwa kuwa Arbusto ‘kichaka’ Bush bado anakumbukumbu ya kuvurumisha dege la Jeshi, F-102  Fighter, kule Texas Air Nation Guard, kwa vyovyote atataka Tanzania kuwa mshirika wake wa kijeshi kwa kile kiitwacho, African Command; ama maslahi ya kijeshi na kiuchumi ya Marekani hapa Barani.

   Kwa kuwa Rais Kikwete ni mwanajeshi; tena wa enzi zile za vita baridi, tunaimani atakuwa ‘chonjo’ na jamaa huyu, kama ataleta njama zozote za kutaka kuchukua mwambao wetu kiulinzi, ama maliasili zetu kiuchumi.

   Jambo moja tunaomba Rais Kikwete alikatae: Udhalilishaji na nyodo za Wamarekani kwa mataifa anayotembelea rais wao.

 Vyombo vya ulinzi vya nchi anakotua hugeuka ‘mdoli’ ama sanamu.Ombaomba huwekwa kizuizini ili wasionekane mabarabarani wakitangatanga, barabara hupigwa deki usiku kwa magari ya zimamoto, na viongozi wetu wakuu ama hukatazwa kumkaribia, na  pengine magari ya viongozi wetu hunuswa na mijibwa ya Marekani yanayokuja kwa dege maalum kabla ya Air Force One, kutua.

   Hawa jamaa huja na magari yao ‘Bullet Proof’ ili rais wao asishambuliwe kwa namna yoyote na magaidi na wenye msimamo mkali wanaojitoa mhanga, kama walivyomuua Benazir Bhutto huko Pakistan.

  Arbusto ‘kichaka’ na Obama wanapokuwa Dar es salaam pilika pilika huwa nyingi; ni karibia kama Amri ya hatari huwa imetangazwa.

 Usafi huwa wa hali ya juu, ulinzi wa polisi na usalama barabarani wenye vyeo vikubwa; hapana tuseme FBI na makachero wengine huwa kila sehemu, kila mahali kusikiliza na kuchunguza chochote kisemwacho kumhusu jamaa huyu, Arbusto.

   Marekani inajidai sana kusemea demokrasia na haki za binadamu.
Bush aliwahi kudaiwa kumwibia kura Al(bert) Gore mwaka 2000 hadi kesi ilipohamia mahakamani, baadaye  AlGore akakubali kushindwa, kwa maslahi ya Marekani.

   Kuhusu haki za binadamu, Arbusto hana cha kusema kwa sababu anadaiwa kumiliki jela Abu-Ghraibu, mjini Baghdad na Guntanamo nchini Cuba. Juzi tumewaona wafungwa wakichechemea na kugomea chakula, lakini nani aseme?
Huko watuhumiwa wa ugaidi huteswa bila kupelekwa mahakamani….hiki nacho ni kivuli cha kichaka kinachotisha wanyonge.

   Digrii yake ya Uzamili katika Usimamizi wa Biashara aliyopata katika Chuo Kikuu cha Harvard mwaka 1975, kama ataitumia vema kumshauri Rais wetu kutowatumia akina ‘Karamagi’ katika mikataba… Buzwagi na Richmond; tutampongeza sana.

 Lengo ni kutaka wanyonge wa nchi hii kupata mgawo katika ‘kasungura’ kadogo kanakoishia mikononi mwa wajanja.Kumbuka, mfisadi huficha fedha zetu katika mabenki hata ya Marekani, baadaye hukimbilia huko, Bush akiwa kimya.

   Bush, ni wa pili kwa watoto wa Marais kutawala Marekani. Mwingine ni John Quincy Adams, mwaka 1824.Asigeuke somo hapa kwa watoto wa wakubwa kuhamia NEC ya CCM  kila unapofika msimu wa uchaguzi  ili kusaka madaraka.Watoto wa wachungaji huwarithi baba zao.

    Ni kwa sababu hii, tunamtaka Bush  na Obama wakifika Washington, wakemee mabepari wanatunyonya kwa kutumia makampuni yao ya uwekezaji hapa na kuwanyima watu ajira. Mengine hewa.

  Bila shaka, atawaona watu maskini na wenye Ukimwi hapa; atawaona ombaomba, pengine atasikia habari za machangudoa, atatembelea mbuga zetu na kutamani kujenga hoteli la nyota sita(six star hotel), afikirie kutupa ajira sisi, na si Wamarekani.

  Shime, Bush afikirie maslahi ya mtu mweusi wakati huu anapojitayarisha kuipisha White House.

   Tanzania ni taifa dogo la watu milioni 46 kulinganisha na Marekani yenye milioni 250.Bila shaka  Obama atajifunza namna tunavyopambana na akina ‘Karamagi’ huku bila kupigana ngeu, kama ‘nyumba’ ya jirani.Fujo zimeanza,lakini angalau tuna amani.

 Shime, aambiwe kutusaidia kuwatia mbaroni akina Ballali , pindi wanapotimkia huko, baada ya kutu ‘richmond’ huku!

   Mwisho, kwakuwa  Marehemu Osama Bin Laden hajawahi kukimbilia huku kwetu, na kwa kuwa watuhumiwa wa ugaidi wengi si wa dini, rangi ama ukoo Fulani tu.Obama asitufanye sisi magaidi.

  Basi, Wamarekani wanapokuja Dar es salaam(Bandarisalama), waepuke nyodo zao za ulinzi, utadhani sisi nyau –wakombamboga.

   Watuamini kuwa sisi ni rafiki tu…tafadhali Rais mwingine wa Marekani akija hapa kwetu, asiigeuze Tanzania Jehanum:

 Moja, kwa itifaki na mikogo ya ulinzi, pili kwa kuzuia mfumo wa kawaida wa maisha. Tatu, kwa kupandisha bei hata za mafuta, kukata na kuingilia mawasiliano yetu, kusumbua ombaomba wetu, machangu na kunyanyapaa viongozi, waandishi wetu na makachero.

   Mwisho, mikogo na utajiri wa Marais wa Marekani usiowaongoze katika tamaa mbaya vigogo wetu kwa fahari na utajiri wao.
Unajua Rais Bush, mbali na biashara zake za madini na mafuta  alikuwa anapokea mshahara wa dola 400,000(zinazotozwa kodi) kwa mwaka. Alilipwa alawansi ya matumizi dola 50,000(hazitozwi kodi) kwa mwaka, kwa kazi za kiofisi.

  Rais Mwai Kibaki wa Kenya alikataa kulipwa mshahara kama huo wa dola za Marekani 500,000 kwa mwaka, wakati raia wake wakingali masikini.

 Bush, alililipwa pia masurufu ya safari kama dola 100,000(hazikatwi kodi) kwa mwaka; na pia hupewa dola 19,000 za viburudisho ama burudani. Anuani yake ya barua pepe ni president@whitehouse.gov mtu yeyote aweza kumwandikia na hata kumkosoa ijapokuwa ni mbabe tu kama  madikteta wengine.

 Hata hivyo,Rais wa zamani Venezuela, Hugo Chavez alipomtukana wakati wa Mkutano wa Umoja wa Mataifa(UN)  mwaka 2007,akapewa saa chache  awe ameondoka jijini New York. Nitafuatilia mshahara wa Obama na Michelle.
Siku hizi Venezuela 'Jembe' limelala, anatawala Nicolas Maduro,nchi imeanza kuwaka moto kwa ushawishi wa hawa jamaa.Sasa Obama yuaja hapa Afrika Mashariki, atatufanyia nini kama si kuja kuleta nyodo na shinikizo hapa?
Itaendelea

    0754/0785 324 074

 

 

---

Ziara za akina Bush na Obama Afrika hazina mashiko(2)

NILIPOWAONA, naam katika televisheni, Mke wa Rais Mama Salma Kikwete na Mke wa Rais wa Marekani, Laura Welch Bush, Jumanne Septemba 25  jijini New York, nikajisaili kimoyomoyo: Hawa, wana nini cha kufanana?

    Salma Kikwete alikuwa na mumewe jijiiini New York, Rais Jakaya Kikwete aliyekuwa akihudhuria Mkutano wa Umoja wa Mataifa, .

    Laura Bush ni mpole; si mwenye harara. Ni mtulivu; mvumilivu dhidi ya mabaya. Ni mwenye upendo kwa watu wenye dhiki, hususan wagonjwa.

      Alipofika Tanzania mwaka 2005, aliwatembelea wagonjwa wa Ukimwi; akawaona yatima na kuahidi kupoza madhila yaliyowakabili.

    Jumapili, Novemba 4 mwaka huu, Laura Welch Bush atakuwa anatimiza miaka 58. tangu azaliwe huko Midland, Texas. Alizaliwa katika familia ya kidini. Amesoma shahada ya kwanza Chuo Kikuu cha  Southern Methodist, Dallas.

        Alisoma ya pili(Masters) ya Sayansi na Ukutubi katika Chuo Kikuu cha Texas. Alikuwa mwalimu na mkutubi Texas, kabla ya kuolewa na George Walker Bush, Novemba 5, mwaka 1977.

   Kwa hakika, picha niliyoiona ya Mama Salma Kikwete na Laura Bush, katika Maktaba ya Pierpont Morgan, jijini New York, ilinikumbusha kwamba Laura ni Mkutubi na pia mwalimu kama Mama Salma. Nikajiuliza: Hawa, wanashahiana nini?

    Sijui walizungumza nini wanawake hawa wawili, walipokutana hapo Maktaba jijini New York?

      Nadhani, bila shaka Mama Salma hakusahau kumwalika Laura nyumbani Tanzania, ili aje tena kutembelea Serengeti, Mlima Kilimanjaro, Oldonyo Lengai  Pengine kukagua miradi ya harakati za kupambana na Ukimwi na kupunguza umasikini.

     Laura Welch Bush(58) amefika Afrika Mashariki mara mbili. Julai 2003 alikuwa Nairobi. Na aliwasili katika Uwanja wa Ndege wa Dar es salaam, DIA(sasa wa Mwalimu Nyerere) Jumatano Julai 13, mwaka 2005.

    Alikuwa katika ziara ya siku mbili chini.

   Alipokelewa na Mke wa Rais, Mama Anna Mkapa(wakati huo) na Waziri wa Maendeleo ya Jamii, Jinsia na Watoto, Dk. Asha-Rose Migiro, ambaye sasa ni Msaidizi wa Katibu Mkuu wa Umoja wa Mataifa.

    Laura Bush alipowasili Da es salaam mwaka huo, alilindwa sana na makachero wa Marekani. Alikuja na mmoja wa mabinti zake mapacha, Jenna. Walikuwa wakitokea Gaborone, Botswana. Aliandamana na ujumbe wa watu zaidi ya 30, wakiwemo waandishi wa habari 12 na maofisa wengine.

    Kufuatia ‘protokali’ ya mikogo ya Kimarekani, hakupanda gari aliloandaliwa na mwenyeji wake, Mama Anna Mkapa. Alikwea moja la gharama sana-naambiwa  MAREHEMU Michael Jackson alikuwa akitumia magari kama haya ya bei mbaya kuendea na kutoka mahakamani, wakati wa kesi yake ya kulawiti. Wamarekani wana ‘nyodo’…

     Naam, Mama Laura alikwea  Limousine, lenye milango sita. Alilindwa na mbwa maalum wa kubaini mabomu ama milipuko. Si unajua tena kitisho cha al-Qaeda? Mama Anna Mkapa alijitutumua na Mercedes Benz.

     Mbwa wa Marekani walinusa kila kitu uwanja wa ndege, saa mbili kabla ya Laura kutua. Hata mawasiliano yote ya simu yalikatika mama huyu alipokuwa akitua kwa mbwembwe za kitajiri.

    Nikakumbuka ulinzi wa Wamarekani hawa kwa Waziri wao wa Mambo ya Nje, Madeleine K. Albright, alipofika Dar sa salaam kuhudhuria maziko ya Hayati Mwalimu mwaka 1999. Leo ni miaka minane tangu Mwalimu aage Dunia St. Thomas jijini London.

    Nikakumbuka pia ‘nyodo’ za Makachero- Wamarekani- alipokuja Rais William(Bill) Jefferson Clinton mjini Arusha, Jumatatu Agosti 27 mwaka 2000.

    Clinton alitua uwanja wa ndege wa Kilimanjaro(KIA) ili kushiriki utiaji saini makubaliano ya kurejesha amani ya Burundi. Alialikwa na Msuluhishi wa mgogoro huo, Rais Mstaafu wa Afrika Kusini, Nelson Rolihlahla Mandela, ambaye wapenzi wake humwita, Madiba.

    Protokali ya ulinzi na mbwembe za Wamarekani zilifanya mawasiliano ya Dar es salaam na Arusha kukatika; mbwa wakanusa magari hata ya viongozi wa juu wa serikali, wakati askari wetu wa Usalama Barabarani, makachero na waandishi wa habari walitimuliwa wasikaribie kwa wakubwa hao!

   Ombaomba na wakoma waliondolewa mitaani, kisha magari ya Zimamoto tuliyozoea kuyaona yakizima moto, yakapiga ‘deki’ barabara! Kwa hakika, napendekeza Mama Salma Kikwete ayaige yote mazuri kutoka kwa Laura Bush, lakini kamwe asiendekeze ‘nyodo’ za namna hii. Aendelee kuwa mtu wa watu na mlezi wa Taifa letu.

    Wake wengine wa Marais wa Marekani ni pamoja na Jacqueline Lee Bouvier(mke wa Rais Kennedy), Claudia ‘Lady Bird’ Alta Taylor Johnson, Thelmacathy Patricia Ryan Nixon, na Elizabeth Bloomer Warren Ford, mke wa Gerald Ford.

    Wengine ni Anne Frances ‘Nancy’ Robbin Davis Reagan, Barbara Pierce Bush(mama mzazi wa George W. Bush, Hillary Rodham Clinton na Laura ‘rafikiye’ Mama Salma.

    Laura ana mabinti wawili; Barbara(alipewa jina la mama yake Bush) na Jenna, jina la mamaye Laura. Ni mapacha waliozaliwa mwaka 1981. Mama huyu hujishaghulisha na masuala ya Afya ya akina mama, hususan vita dhidi ya saratani ya matiti.

    Ni changamoto kwa Mama Salma kuepuka biashara zote awapo Ikulu, ili akazanie elimu na Afya(mama Salma pia ni Mwalimu kama Laura Bush), lengo likiwa kupunguza umasikini wa watu, magonjwa kama Ukimwi na umasikini, bila kusahau maendeleo ya akina mama.

    Wapo wake wengi wa Marais walioacha ulezi kwa taifa wakaanza kufanya hata biashara za magendo wakiwa Ikulu(si Tanzania), wapo waliowahi kuwapiga ngumi hata mawaziri na waandishi wa habari.

   Wapo wanaoishi maisha ya anasa sana kwa pesa za walipakodi, bila kulifanyia taifa kitu chochote, ia\sipokuwa nyodo na anasa!

     Pia, wapo wanaotibiwa mafua Paris, Washington na Geneva, wakati akina mama wetu hapa wakilazwa wanne kitanda kimoja, hususan wakati wa kujifungua… Mama Salma Kikwete asije kuwa miongoni mwa hawa.

    Mke wa Rais wa Maisha, Dikteta Jean-Bedel Bokassa, alilazimisha wanafunzi wote wa shule kununua sare katika moja ya duka lake! Walipogoma na kufanya maandamano, waliuawa si chini ya 100!

Mama Salma asiache kuwa kama mkewe Pilato Mrumi, alivyomtetea Yesu wa Nazareth kuwambwa msalabani..

    Tanzania ipo mifuko kama Fursa sawa kwa Wote(EOTF) ambayo haijulikani ipo kwa manufaa ya nani? Mama Salma Kikwete hastahili kufanya biashara hizo, isipokuwa awe na Taasisi ya Malezi ya Taifa(TMT).

    Salma Kikwete(kama mwalimu na mlezi wa Taifa) angeanzisha Taasisi ya Malezi ya Taifa itakayonusuru vijana katika maangamizi ya Ukimwi, umaskini, biashara ya ukahaba, madawa ya kulevya, ujinga na mmomonyoko wa maadili na Afya ya mwili na kili.

    Katika Dunia ya Utandawazi, Mama Salma Kikwete akimshirikisha Laura Bush, watawaokoa vijana dhidi ya majanga haya ya madawa ya kulevya, Ukimwi na biashara ya ngono inayofanywa sasa ili kujitafutia kipato.

    Nahisi, Mkataba wa Ushuru wa pamoja wa Afrika Mashariki(East African Customs Union Treaty) ulishaleta soko la pamoja hata la makahaba katika Afrika Mashariki. Makahaba, wakiwemo watoto wadogo kutoka hata Rwanda, Burundi, Somali na Afrika Kusini, wananyatia soko hilo ili kuendesha biashara ya ngono(sex trade) na kumomonyoa maadili licha ya janga la Ukimwi.

   Mwishoni mwa Desemba mwaka 2003, polisi wa Kenya waliwatia mbaroni wasichana wasomi wa vyuo vikuu, wakiuza mapenzi katika mitaa ya Nairobi, hususan Koinange, wao huita, ‘K-Street’! Hapa Tanzania mitaa kama hiyo huitwa Uwanja wa Fisi!

   Si muda mrefu kuanzia sasa, wasomi wa vyuo vikuu watanyatia soko hilo la biashara ya ngono; wataacha kulihudumia Taifa ili kujipatia kipato kutokana na ngono

   Hivyo, kunahitajika Taasisi yenye nguvu ya kutoa nasaha kuzuia hali hii.

   Kadiri siku zinavyokwenda, ukahaba unatazamwa kama biashara ya kawaida, inayowavutia wasomi na watu wengine, hadi wamebadili majina kutoka ‘changudoa’, ‘wauza kuku’ au makahaba na kuwa Wafanya Biashara wa Ngono, Commercial Sex Workers(CSW)!

    Ni kwa sababu hiyo, Itifaki ya Ushuru wa pamoja(EACU) itawaleta pia wauza madawa ya kulevya, ‘dada poa’ na ‘kaka poa’ wengi kutoka nchi zote za Afrika Mashariki,  pengine kutoka Afrika Kusini na Ulaya.

   Watasababisha mmonyoko mkubwa kabisa  wa maadili na gharika kwa vijana, ambao wataingilia biashara hiyo kama wafanyabiashara wa ngono, Commercial Sex Sellers!

 Ni kwa sababu hiyo, Taasisi ya Malezi anayoweza kuanzisha Mama Salma kwa kushirikiana na Lura Bush, na Michelle Obama, itapambana na biashara hiyo kwa kutoa mafunzo na ushauri-nasaha,  ili kuwaokoa wasichana wetu wakiwemo wanafunzi kuwa, Sex Seller Girls(SSG)!

     Taasisi kama hii inaweza kuendeshwa kwa msaada mkubwa wa watu kama Mama Laura Bush; yumkini ikafanikiwa kuwarejesha wasichana na wavulana masomoni, baada ya kukatisha masomo kwa mimba, au kuolewa, na wavulana  bangi na madawa ya kulevya.

    Taasisi  ikianzishwa na Laura Bush na Mama Salma, inaweza kufadhiliwa na watu maarufu sana hapa Duniani, kama Bill Clinton, Nelson Mandela, Tony Blair,  n.k. Mama Salma atakuwa mke wa kwanza wa Rais atakayejitofautisha na wenzake kwa kuokoa kizazi katika maangamizi ya Ukimwi, madawa ya kulevya na ukahaba katika zama hizi za utandawazi.

    inaweza kuwa Taasisi itakayolea na kufufua vipaji vya vijana. Badala ya biashara ya ukahaba kubadili maendeleo ya watoto kielimu, watazaliwa hapa akina Venus na Serena Williams, akina Didier Drogba, watakaoiletea Tanzania medali za heshima, badala ya hawa kugeukia biashara ya ngono kwa wageni na wawekezaji wa migodi na kubwia unga.

   Zamani, ilidhaniwa jamii na madhehebu ya dini yangeweza kuifanya kazi hii. Sasa, imegundulika, vijana na watoto hawako salama katika madhehebu ya dini, kwa kuwa hata  wachungaji, masheikh  na mapadri wameripotiwa kumomonyoa maadili kwa kiwango cha kutisha. Tunahitaji Taasisi ya Malezi.

    Hivyo, Mama Salma na Laura Bush  ama Michelle wakianzisha Taasisi ya Malezi Tanzania, wataliokoa Taifa katika maangamizi. Bila shaka Mama Salma ataibuka Shujaa wa Taifa atakayetoka pasipojulikana(from Zero to Hero) na kutoa mwanga namna Taifa linavyoweza kuokoa maisha ya watoto na vijana wake kwa kuwaandaa kuwa wazalendo na raia waaminifu.

   Taasisi hiyo pia itakemea unyanyasaji na udhalilishaji kama wa akina Mfalme Mswati III wa Swaziland, wanaooa vigoli kila mwaka, bila kujali Ukimwi na Haki za Msingi za Wanawake.

   Kwa kuwa kuna habari kuwa Michelle na mumewe walikwisha alikwa hapa nchini, t tunawakaribisha kwa moyo mkunjufu,ikiwezekana wafike kabla ya kumaliza Mhula wao mwakani.

    Naungana na Mama Salma na Watanzania wengine kumkaribisha Laura na George W. Bush, Obama na Michelle kwa wimbo, ‘Welcome  to Tanzania’ ulioimbwa na Hayati Pepe Kalle na wenzake, Djuna Bileku Mpasi, Papy Tex, Ikomo Djodjo, Lofombo na wengine wote wa Empire Bakuba… Welcome to  Tanzania!!

Itaendelea

    0754 324 074

     0713 324 074

www.congesmramba.blogspot.com